PSJ Luis Enrike ilə yeni müqaviləyə yaxındır.

90plus.az xəbər verir ki, bir neçə aydır davam edən danışıqlar müsbət irəliləyir və tərəflər mövsümün sonuna qədər yekun razılaşma əldə etməyi hədəfləyir. Yeni müqavilənin 2030-cu ilə qədər nəzərdə tutulduğu bildirilir - RMC Sport.

Mənbəyə əsasən, maliyyə məsələləri əsas problem deyil. İspan mütəxəssis Parisdə özünü rahat hiss edir və klub onun şəxsi komfortuna xüsusi önəm verir. PSJ Enrikeyə yeni yaşayış yeri tapmaqda da kömək edir. Hazırda Sen-Jermen-an-Le bölgəsində yaşayan baş məşqçi ailə rahatlığı üçün şəhərə daha yaxın əraziyə – məsələn, Nöyi istiqamətinə köçməyi düşünür.

Danışıqlarda ciddi maaş artımı da yer alır və bu, Enrikeni Avropanın ən çox qazanan üç məşqçisindən birinə çevirə bilər.

Qeyd olunur ki, bu uzunmüddətli müqavilə idman direktoru Luis Kamposun 2030-cu ilə qədər olan sözləşməsi ilə uyğunlaşdırılacaq. Bu isə klub rəhbərliyi daxilində, xüsusilə prezident Nasser Əl-Xelaifi ilə güclü əməkdaşlığın göstəricisi sayılır.

Xatırlatma: Luis Enrike PSJ-yə tarixində ilk dəfə Çempionlar Liqasını qazandırıb və klub daxilində onun rolu yüksək qiymətləndirilir.