ABŞ-da keçirilən Liqalar Kubokunun İntizam Komitəsi “İnter Mayami” ilə “Sietl Saunders” arasında matçdan sonra baş verən insidentlə bağlı qərarlarını açıqlayıb.

90plus.az xəbər verir ki, beş gün əvvəl baş verən qalmaqallı davadan sonra bir neçə futbolçu və texniki heyət üzvünə cəzalar verilib.

Ən ağır cəza isə “İnter Mayami”nin ulduzu Luis Suaresə verilib. Təcrübəli hücumçu rəqib komandanın personalına tüpürdüyü üçün 6 oyunluq cəza alıb. Suaresin bu hərəkəti Liqalar Kuboku rəhbərliyi tərəfindən kobud idman davranışı kimi qiymətləndirilib.

Komandadaşları da cəzasız qalmayıb. “İnter Mayami”dən Serxio Buskets zorakı davranışına görə 2 oyun, Tomas Aviles isə oxşar səbəbdən 3 oyunluq diskvalifikasiya edilib.

Digər tərəfdən, “Sietl Saunders”in köməkçi məşqçisi Stiven Lenhart da qarşıdurmadakı aqressiv davranışına görə 5 oyunluq cəza alıb.

Qeyd: Bu cəzalar yalnız Liqalar Kuboku oyunlarına şamil olunur. MLS rəhbərliyi tərəfindən əlavə sanksiyaların tətbiq edilə biləcəyi bildirilib. Həmçinin, insidentdə iştirak edən bütün tərəflərə açıqlanmayan məbləğdə pul cərimələri də tətbiq olunub.