“Mançester Yunayted” Mazraui məsələsinə görə FIFA-ya şikayət etdi.

90plus.az xəbər verir ki, “Mançester Yunayted” Premyer Liqada “Bornmut”la 4:4 hesablı dramatik heç-heçə ilə bitən oyundan sonra FIFA-ya rəsmi müraciət ünvanlayıb. Klub qarşılaşma ərəfəsində onlara qarşı ədalətsiz davranıldığını düşünür.

“Old Trafford”da keçirilən oyunda Ruben Amorimin rəhbərlik etdiyi komanda onsuz da müdafiə xəttində ciddi itkilərlə üzləşmişdi. Harri Maquayr və Matteys de Liqt zədə səbəbindən heyətdə yox idi. Vəziyyət isə Noussair Mazraui oyunda iştirak etmədikdən sonra daha da çətinləşdi.

Mazrauinin yoxluğunun səbəbi isə “Mançester Yunayted”in Mərakeş milli komandasının futbolçusunun Afrika Millətlər Kubokuna (AFCON) daha gec buraxılması ilə bağlı xahişini rədd etməsi olub. FIFA bu ayın əvvəlində AFCON-da iştirak edən futbolçuların klublardan buraxılma tarixinin 15 dekabra qədər uzadıldığını təsdiqləmişdi. Maraqlıdır ki, “Bornmut”la oyun da məhz həmin günə təsadüf edirdi.

“Mançester Yunayted” Kamerun və Fil Dişi Sahili federasiyaları ilə razılığa gələrək Bryan Mbeumo və Amad Diallonun oyunda çıxış etməsinə nail olmuşdu. Lakin Mərakeş tərəfi Mazraui ilə bağlı oxşar müraciəti qəbul etmədi. Müdafiəçi oyundan əvvəlki günlərdə klubla məşq etsə də, Mərakeş Futbol Federasiyası onun bazar günü Komor adalarına qarşı AFCON oyunundan öncə düşərgəyə daha tez qoşulmasını tələb edib.

“The Independent” nəşrinin məlumatına görə, “Mançester Yunayted” artıq FIFA ilə əlaqə saxlayaraq bu məsələ ilə bağlı “dəstək və izahat” istəyib. Klub hesab edir ki, Mərakeş tərəfi Premyer Liqa oyununu deyil, sadəcə məşq prosesini üstün tutub.

BBC isə bildirir ki, “Yunayted” oyunun bazar günündən bazar ertəsinə keçirilməsindən də narazı qalıb. Çünki həftəsonu oynayan digər klublar Afrika millisində olan futbolçularını heyətdə saxlaya bilmişdilər.

“Mançester Yunayted” Premyer Liqada bu həftə “Aston Villa”ya qarşı keçiriləcək oyunda da Afrika millisində olan futbolçularının xidmətindən məhrum olacaq.