“Mançester Yunayted” Onananı göndərməyə hazırlaşır.
90plus.az xəbər verir ki, kamerunlu qapıçı artıq İngiltərə klubunun planlarında yer almır.
İngiltərə klubu qolkiperə yeni müqavilə təklif etməyib, həmçinin onun maaşını 25 faiz azaldıb.
Onananın yerini isə Ruben Amorimin rəhbərliyi altında “Mançester Yunayted”in əsas qapıçısı kimi Altay Bayındırın tutacağı bildirilib.
Səudiyyə Ərəbistanının açıq marağı
“Team Talk”ın məlumatına görə, “Mançester Yunayted” strategiya dəyişikliyinə gedərək Andre Onananın ayrılığı ilə bağlı danışıqlara hazırdır. Klub 29 yaşlı qolkiperin karyerasını Səudiyyə Ərəbistanı Pro Liqasında davam etdirməsi ehtimalını ciddi şəkildə nəzərdən keçirir.
Onananın 2023-cü ildə 50 milyon avroya “Old Trafford”a gəlişi böyük gözləntilərlə qarşılanmışdı. Lakin qapıçının İngiltərədəki iki mövsümü enişli-yoxuşlu çıxışlarla yadda qaldı. Ardıcıllıqdan uzaq və bəzən etibarsız performanslar nəticəsində klub rəhbərliyi qəti qərar verib – zərəri minimuma endirmək və onun satışına şərait yaratmaq. Bu isə həm oyunçu, həm də klub üçün çətin bir mərhələnin sonu ola bilər.
29 yaşlı Onana 2024/25 mövsümündə 50 oyunda meydana çıxıb, 65 qol buraxıb və 11 dəfə qapısını toxunulmaz saxlaya bilib.
Təcrübəli qapıçının “qırmızı şeytanlar”la müqaviləsi 2028-ci ilin yayına qədər davam edir. “Transfermarkt”a görə, Onananın hazırkı bazar dəyəri 25 milyon avrodur.
