39 yaşlı qapıçı Skott Karson “Mançester Siti”də keçirdiyi altı mövsümlük unudulmaz macəranın ardından klubdan ayrılıb.
90plus.az xəbər verir ki, İngiltərənin nəhəng klubu ilə müqaviləsi başa çatan Karson “Siti” ilə keçirdiyi müddətdə cəmi 107 dəqiqə meydanda olsa da, 12 kubok qazanmağa nail olub.
Komandada üçüncü qapıçı rolunu icra edən təcrübəli futbolçu oyun vaxtından çox soyunma otağındakı liderliyi və məşqlərdəki töhfəsi ilə seçilib. Baş məşqçi Pep Qvardiola tərəfindən oyunçu qrupunda tarazlıq yaradan vacib fiqur kimi qiymətləndirilən Karson eyni zamanda gənc qapıçılara mentorluq edib.
Skott Karsonun “Mançester Siti” ilə olan rəsmi müqaviləsinin başa çatdığı açıqlanıb. Onun peşəkar futbol karyerasına davam edib-etməyəcəyi isə hələlik bəlli deyil. Azarkeşlər isə Karsonun “Siti”dəki fəaliyyətini zarafatla “dünyanın ən yaxşı peşəsi” adlandırırlar.
Hər 9 dəqiqəyə 1 kubok
Altı mövsümdə cəmi 107 dəqiqə meydanda olan Karson bu müddətdə hər 9 dəqiqəyə bir kubok hesabı ilə mükafat qazanıb. Bu isə onun peşəkar karyerasında nadir rast gəlinən statistikaya sahib olduğunu göstərir.
