"Mançester Yunayted" futbolun hüdudlarını aşaraq basketbol sahəsinə də çıxmaq imkanını nəzərdən keçirir.

90plus.az xəbər verir ki, klubun kiçik pay sahibi Sör Cim Retklif basketbol komandası yaratmağı düşünür. Bu addım dünyanın ən dəyərli idman brendlərindən biri olan "Yunayted"in qlobal nüfuzundan faydalanmaq məqsədilə atılır. Klub keçən il rekord maliyyə gəlirləri əldə etsə də, keçmiş baş məşqçi Erik ten Haaqın və hazırkı baş məşqçi Ruben Amorimin rəhbərliyi altında daxili çempionatda uğursuz nəticələr göstərmişdi.

İtaliya Basketbol Federasiyasının prezidenti Canni Petruççi bildirib ki, "Yunayted" NBA Europe layihəsində iştirak etməyi razılaşdırıb. Bu, Milli Basketbol Assosiasiyası tərəfindən Avropada basketbolu inkişaf etdirmək məqsədilə yaradılan yeni təşəbbüsdür. Mançester digər Avropa şəhərləri ilə birlikdə liqada françayzilərdən - liqada iştirak edən rəsmi klublardan birinə ev sahibliyi edəcək və liqada ən azı 10 komanda planlaşdırılır.

Petruççi “Corriere dello Sport” qəzetinə deyib:

“Bu, sistem üçün faydalı olacaq, həm resurslar gətirəcək, həm də əyləncəni təmin edəcək. Razılaşmada qeyd olunub ki, qeydiyyatdan keçmiş klublar öz ölkələrinin daxili liqalarında da iştirak etməlidir.

50 milyard dollarlıq bazarda Avropa basketbolunun kommersiya dəyəri yalnız 200 milyon dollardır. NBA liqası məhz rəqabəti artırmaq və potensialı genişləndirmək imkanıdır. Əgər dünyanın ən məşhur futbol komandası olan "Mançester Yunayted" artıq razılıq veribsə, bunun mütləq bir səbəbi var.”