“Mançester Yunayted”in seriyası pozuldu – 493 gündür saçını kəsdirməyən azarkeşə Ueyn Runi sərt reaksiya verdi.
90plus.az xəbər verir ki, İngiltərə Premyer Liqasının 26-cı turunda “Mançester Yunayted” səfərdə “Vest Hem Yunayted”in qonağı olub. London Olimpiya Stadionunda keçirilən qarşılaşma 1:1 hesablı heç-heçə ilə başa çatıb və qonaq komandanın 4 oyunluq qələbə seriyası sona çatıb.
Yeni baş məşqçi Maykl Kerrikin rəhbərliyi altında ardıcıl 4 matçda qalib gələn “Qırmızı Şeytanlar” beşinci qələbəyə çox yaxın olsa da, bu mümkün olmayıb. Bu nəticə xüsusilə sosial media fenomeni Frenk Aylet üçün böyük məyusluqla yadda qalıb.
493 gündür saçını kəsdirmir
“Mançester Yunayted” ardıcıl 5 oyun qalib gəlməyincə saçını kəsdirməyəcəyinə and içən Aylet komandasının 4 oyunda qələbə qazanmasından sonra bərbərə getməyə çox yaxın idi. O, 2024-cü ilin oktyabr ayından bəri saçını uzadır və bu vəziyyət son illər qeyri-sabit çıxışları ilə diqqət çəkən “Mançester Yunayted”in simvollarından birinə çevrilib.
Aylet oyun öncəsi izləyicilərinə müraciətində demişdi: “Bu saçlar tezliklə gedəcək. Növbədə ‘Vest Hem Yunayted’ var. 5 oyundan 4-nü qazandıq. Bu çağırışı başladığımdan bəri ilk dəfədir ki, 4 oyunu ardıcıl uduruq. Bu dəfə alınacaq.”
Lakin “Mançester Yunayted”in 1:1-lik heç-heçəsi səbəbindən fenomen verdiyi sözə sadiq qalmalı olub və saçlarını kəsdirmək şansını yenidən itirib.
Ueyn Runidən sərt sözlər
Məsələ İngiltərə futbolunun əfsanəvi simalarından olan Ueyn Runinin də diqqətini çəkib. “Mançester Yunayted”in sabiq hücumçusu sosial şəbəkə fenomeninə sərt reaksiya verib.
Runi açıqlamasında bildirib: “Əlimdə olsa, onu ölkənin o biri başına göndərərdim, məni dəli edir. Əminəm ki, ‘Mançester Yunayted’ beşinci oyunu da qazansa, birdən-birə əhəmiyyətsiz olacağı üçün məyus olacaqdı.”
Beləliklə, həm meydandakı seriya qırılıb, həm də sosial mediada maraqlı çağırış bir müddət də davam edəcək.
