“Kristal Palas” – “Mançester Yunayted” matçında penaltinin təkrarlanması mübahisələrə səbəb oldu.
90plus.az xəbər verir ki, İngiltərə Premyer Liqasının 13-cü turunda “Kristal Palas” ilə “Mançester Yunayted” arasında keçirilən qarşılaşmada qeyri-adi hadisə yaşanıb. Meydan sahiblərinin qazandığı penaltinin təkrarlanması həm azarkeşlər, həm də futbol mütəxəssisləri arasında geniş müzakirələrə yol açıb.
Oyunun 32-ci dəqiqəsində “Kristal Palas” penalti qazanıb. Zərbəni yerinə yetirən Jan-Filipp Mateta topu qapıdan keçirib. Lakin VAR müdaxiləsindən sonra penaltinin təkrarlanmasına qərar verilib. Yenidən baxılanda Matetanın zərbə anında topa iki dəfə toxunduğu müəyyən edilib. Bununla belə, penalti ləğv edilməyib, əksinə yenidən vurdurulub və bu qərar ciddi suallar yaradıb.
Bu epizod futbol ictimaiyyətinə ötən mövsüm UEFA Çempionlar Liqasının 2024/25 mövsümündə “Atletiko Madrid” ilə “Real Madrid” arasında oynanan həlledici oyunu xatırladıb. Həmin matçdakı penaltilər seriyasında Xulian Alvarezin zərbəsi topa iki dəfə toxunduğu üçün ləğv edilmiş və qol qeydə alınmamışdı.
Məhz həmin hadisədən sonra qaydalarda dəyişiklik edilmiş, bu kimi vəziyyətlərdə penaltilərin təkrarlanması qərara alınmışdı. Lakin yeni qaydanın yalnız qolla nəticələnən penaltilərə şamil ediləcəyi və 1 iyuldan etibarən qüvvəyə minəcəyi IFAB tərəfindən açıqlanmışdı.
“Kristal Palas” – “Mançester Yunayted” matçında verilən qərar isə qaydanın tətbiqi ilə bağlı suallar doğurub və müzakirələr hələ də davam edir.
