Mateuş Koxalski: “Qurban Qurbanovun tələbkarlığı “Qarabağ”ı irəli aparır”.
90plus.az xəbər verir ki, “Qarabağ”ın qapıçısı Mateuş Koxalski baş məşqçi Qurban Qurbanovun iş prinsipləri və Azərbaycan çempionatı ilə bağlı fikirlərini bölüşüb.
Polşalı qolkiper “Region Plus”a müsahibəsində bildirib ki, komandanın sabit uğurlarının əsas səbəblərindən biri baş məşqçinin sərt və prinsipial yanaşmasıdır:
“Qurban Qurbanov çox tələbkar məşqçidir. Məhz bu yanaşma sayəsində “Qarabağ” daim yüksək səviyyədə çıxış edir”.
Koxalskinin sözlərinə görə, Misli Premyer Liqasında rəqabət ildən-ilə artır:
“Çempionatda ən çətin oyunlar adətən “Zirə” və “Sabah”a qarşı olur. Bu komandalar güclü futbolçulara və yüksək motivasiyaya malikdirlər. Ümumilikdə liqanın hər mövsüm inkişaf etdiyini görmək mümkündür”.
Qapıçı komandadakı münasibətlərə də toxunub. O, ən yaxın olduğu futbolçunun Aleksey Kaşuk olduğunu qeyd edib:
“İlk gündən aramızda yaxşı əlaqə yarandı və daha çox vaxtı onunla keçirirəm. Amma ümumilikdə komandada hər kəslə münasibətim çox yaxşıdır”.
Koxalski Azərbaycandakı həyatla bağlı təəssüratlarını da gizlətməyib:
“İnsanlar çox mehribandır. Yeganə mənfi cəhət yol hərəkəti qaydalarıdır – bəzən hər şey qaydasız yarışa bənzəyir. Azərbaycan mətbəxindən isə paxlavanı xüsusilə sevirəm, ona qarşı durmaq çətindir”.
