NBA-də “Mayami Hit” doğma meydanda “Oklahoma Siti Tander”i 122:120 hesabı ilə məğlub edərək rəqibinin 5 oyunluq qələbə seriyasına son qoyub.

90plus.az xəbər verir ki, Kaseya Mərkəzində baş tutan qarşılaşmada Qərb Konfransının lideri olan “Oklahoma Siti Tander”i qəbul edən “Mayami Hit” bu qələbə ilə mövsümdəki 22-ci uğurunu əldə edib. Oyunun əsas qəhrəmanı Bam Adebayo olub. O, 30 xal və 12 ribaundla dabl-dabl edərək komandasını qələbəyə daşıyıb. Norman Pauell 19, Pelle Larsson isə 16 xalla yadda qalıb.

Qonaq komandada Şay Gilces-Aleksander 39 xalla matçın ən məhsuldar basketbolçusu olsa da, bu performans məğlubiyyətin qarşısını ala bilməyib. Eyni zamanda Aaron Uiqginsin 18 xalı da “Tander” üçün kifayət etməyib. Bu nəticə ilə “Oklahoma Siti Tander” mövsümdə 8-ci məğlubiyyətini alıb.