Mehdi Taremiyə yeni klub axtarışı davam edir.
90plus.az xəbər verir ki, yay transfer pəncərəsinin bağlanmasına bir neçə gün qalmış Mehdi Taremiyə dair vəziyyət hələ də qeyri-müəyyən olaraq qalır. “İnter” iranlı hücumçu üçün yeni həll yolu axtarır. O, ötən il “Portu”dakı uğurlu çıxışından sonra azad agent kimi Milan klubuna qoşulmuşdu.
Bu yay ərzində Premyer Liqadan “Fulhem”, Braziliyadan “Flamenqo” kimi bir sıra klublar maraq göstərsə də, heç biri ciddi addım atmayıb. İndi isə ən real variantlar sırasında Niderlandın PSV komandası və Türkiyənin “Fənərbağça” klubu önə çıxır.
İranlı jurnalist Hatam Şiralizadə Tribuna-ya müsahibəsində Taremiyə dair fikirlərini bölüşüb:
➡️ Tareminin gələcəyi haqqında:
“İstənilən şey baş verə bilər, hətta onun “İnter”də qalması da. Məncə, hazırda ən real seçim PSV-dir. Çünki onlar Çempionlar Liqasında oynayırlar və maaşının böyük hissəsini qarşılaya bilərlər. Üstəlik, Peter Bosun agentləri ilə Taremiyə yaxın nümayəndələr arasında yaxın münasibət var. Bu da bazarın son günlərində prosesi sürətləndirə bilər”.
➡️ Panatinaikos variantı haqqında:
“Avropanın o hissəsindəki klublar həmişə Taremi və Cahanbaxş kimi oyunçular üçün ən son seçim olur”.
➡️ Maaş məsələsi (Taremi ildə 3 milyon avro qazanır):
“Əgər “İnter” onu icarəyə göndərmək istəsə, maaşının bir hissəsini ödəməli olacaq. 33 yaşında futbolçunun böyük maaş endiriminə razı olması çətin görünür, başqa klublar üçün də bu qədər yüksək maaşı qarşılamaq asan deyil”.
➡️ “İnter”lə vəziyyət:
“İnter” də onun transferindən gəlir əldə etmək istəyir. Oyunçunun isə yeni klub seçərkən öz istəkləri və planları var. Mən əminəm ki, əgər o, “İnter”də qalıb oynamaq imkanı əldə etsə, bu mövsüm keçən ildən tamamilə fərqli ola bilər”.
