"Milan" klubu xorvatiyalı ulduz futbolçu Luka Modriçin transferini rəsmi olaraq elan edib.
90plus.az xəbər verir ki, klubun yaydığı açıqlamada bildirilib ki, təcrübəli yarımmüdafiəçi ilə 2026-cı ilin 30 iyun tarixinədək müqavilə imzalanıb. Müqavilədə bir illik uzadılma variantı da mövcuddur.
Luka Modriç peşəkar karyerasına cəmi 16 yaşında, "Dinamo Zaqreb"in akademiyasına qoşulmaqla başlayıb. Ardınca Bosniya və Herseqovinada "Zrinski Mostar" və Xorvatiyada "NK İnter Zapreşiç" klublarına icarəyə göndərilib və inkişafını bu klublarda davam etdirib.
2004-cü ildə "Dinamo Zaqreb"ə qayıdan Modriç bu klubun heyətində 128 oyunda 32 qol vurub və 3 çempionluq, 2 kubok, 1 superkubok qazanaraq komandanın uğurlarında mühüm rol oynayıb.
2008-ci ilin yayında Modriç İngiltərənin "Tottenhem Hotspur" klubuna transfer olunub. O, "Tottenhem"in heyətində 159 oyunda 17 qola imza atıb.
2012-ci ildə isə Modriçin böyük transferi baş tutub – o, İspaniyanın nəhəng klubu "Real Madrid"ə keçib. 13 mövsüm ərzində "Real"ın heyətində 597 matçda 43 qol vuran Modriç klub tarixinin ən titullu futbolçusu olub: 6 Çempionlar Liqası, 5 Klublararası Dünya Çempionatı, 1 Qitələrarası Kubok, 5 UEFA Superkuboku, 4 La Liqa çempionluğu, 2 İspaniya Kuboku və 5 İspaniya Superkuboku.
2018-ci ildə Luka Modriç "Qızıl top" (Ballon d'Or) mükafatına layiq görülüb və bu, onun əfsanəvi karyerasında zirvə nöqtəsi sayılır.
O, həmçinin Xorvatiya millisinin kapitanıdır və ölkə tarixində ən çox oyun keçirən futbolçudur – 188 oyun, 28 qol.
"Milan" klubunun açıqlamasına əsasən, Luka Modriç yeni komandasında 14 nömrəli forma ilə çıxış edəcək.
