Minifutbol üzrə Azərbaycan millisi Slovakiyada keçirilən Millətlər Liqası turnirində final oyununa çıxıb. 

90plus.az xəbər verir ki, yığmamız həlledici görüşdə Slovakiya millisi ilə üz-üzə gəlib. Əsas vaxt 2:2 hesablı heç-heçə bitib.

Penaltilər seriyasında isə meydan sahibləri 3:1 hesablı qələbə qazanıblar. 

Baş məşqçi Elşad Quliyev:

“16 günlük təlim-məşq toplanışı ərzində fikrimiz hər hansı bir turniri qazanmaq deyildi. Bütün uşaqlara şans verib əsas heyəti formalaşdırmaq istəyirdik. Zəif tərəflərimizi üzə çıxarmağa çalışırdıq. İnanıram ki, yaxşı oyunlar keçirdik. İki final oynadıq, uşaqlar özlərini yaxşı tərəfdən göstərə bildilər. Bu futboldur, son saniyələrdə də qol buraxa bilirsən. Ümid edirəm ki, Bakıda keçiriləcək dünya çempionatında daha güclü və qalib komanda görəcəksiniz”.

Qeyd: Azərbaycan yığması toplanış zamanı iki beynəlxalq turnirdə iştirak edib. Monteneqrodakı yarışın qalibi olan komandamız Slovakiyada Millətlər Liqasında ikinci olub.

Dünya çempionatı 21 may - 1 iyun aralığında keçiriləcək. Azərbaycan 32 komandanın iştirak edəcəyi mundialın A qrupunda Sloveniya, Mavritaniya və Bəhreynlə mübarizə aparacaq.