Mohamed Salah Misirin Afrika Millətlər Kuboku öncəsi Nigeriya ilə keçirilən son yoxlama oyununda iştirak etmək üçün vaxtında komandaya qoşula bilməyib.

90plus.az xəbər verir ki, “Liverpul”un cinah hücumçusu noyabrın 22-dən bəri start heyətində meydana çıxmayıb. Bununla belə, onun dekabrın 22-də Zimbabve ilə keçiriləcək Afrika Millətlər Kubokunun açılış matçında Misir millisinin əsas heyətində yer alacağı gözlənilir.

Salah turnirə “Enfild”də çətin dövrdən sonra yollanır. Bu mərhələnin ən çox diqqət çəkən məqamı onun səs-küyə səbəb olan müsahibəsi olub. Həmin müsahibədə futbolçu klubun onu “qurban verdiyini” iddia edib və baş məşqçi Arne Slotla “heç bir münasibətinin olmadığını” söyləyib.

Bundan sonra Salah Çempionlar Liqasında “İnter”ə qarşı qazanılan qələbədə heyətdən kənarda qalıb. Daha sonra isə “Brayton”la oyunda ehtiyatdan meydana çıxaraq 2:0 hesablı qələbədə qollardan birinin ötürməsini verib.

ℹ️ 35-ci Afrika Millətlər Kuboku dekabrın 21-də Mərakeşdə start götürəcək və 2026-cı il yanvarın 18-dək davam edəcək.

Turnirdə iştirak edən 24 milli komanda Final mərhələsi üçün heyətinə maksimum 28 futbolçu daxil edə bilər.