Ölkə başçısından motivasiya zərbəsi: Mozambik yığmasına qalibiyyət üçün böyük mükafat vədi gəldi. Mozambik futbolu tarixi anlar yaşayır.

90plus.az xəbər verir ki, Mozambik milli komandası F qrupunu üçüncü pillədə başa vuraraq ölkə tarixində ilk dəfə 1/8 final mərhələsinə yüksəlib. Son turda Kameruna 1:2 hesabı ilə məğlubiyyət bu yürüşü dayandırmayıb — Mozambik ən yaxşı “üçüncülər”dən biri kimi növbəti raunda adlayıb.

Bu nəticə ölkə rəhbərliyinin də diqqətindən yayınmayıb. Mozambik prezidenti Daniel Fransisko Çapo Yeni il münasibətilə xalqa müraciətində milli komandanın çıxışını “misilsiz uğur” kimi dəyərləndirib və futbolçuların cəsarəti ilə fəxr etdiyini bildirib.

Daha da diqqətçəkən məqam isə prezidentin verdiyi açıq motivasiya mesajı olub. Çapo 1/8 finalda Nigeriya yığması üzərində qələbə qazanılacağı təqdirdə hər bir futbolçu və məşqçi heyətinin üzvünə 500 min metikal (təxminən 13 min manat) mükafat veriləcəyini açıqlayıb. Məqsəd aydındır: komandanın döyüş ruhunu maksimum səviyyəyə çatdırmaq.

Qeyd: Mozambik – Nigeriya qarşılaşması yanvarın 5-də keçiriləcək.