Mixaylo Mudrikin dopinq qərarı qüvvədə qaldı! Ukraynalı oyunçu 4 ilə qədər futbol qadağası ilə üzləşə bilər.
90plus.az xəbər verir ki, İngiltərə Futbol Assosiasiyası “Çelsi”nin ukraynalı futbolçusu Mixaylo Mudriki dopinq qaydalarını pozmaqda ittiham edib. O, uzunmüddətli cəza riski ilə üz-üzədir.
FA-nın qaydalarına əsasən, Mudrik qadağan olunmuş performans artırıcı maddə – meldonium ehtiva etdiyi güman edilən “A” nümunəsində müsbət nəticə verdiyi üçün dörd ilə qədər yarışlardan kənarlaşdırıla bilər. Bu nümunə ötən il götürülüb.
Futbolçu müvəqqəti olaraq cəzalandırılmışdı və həm Mudrik, həm də “Çelsi” ikinci – “B” nümunəsinin nəticələrini gözləyirdi. FA bu gün rəsmi şəkildə futbolçunun ittiham olunduğunu təsdiqləyib.
FA-nın sözçüsü bildirib:
“Mixaylo Mudrikin FA-nın Anti-Dopinq qaydalarının 3 və 4-cü maddələrinə əsasən, qadağan olunmuş maddənin mövcudluğu və/və ya istifadəsi ilə bağlı qayda pozuntusunda ittiham olunduğunu təsdiqləyə bilərik. Bu məsələ araşdırmada olduğu üçün əlavə şərh vermək mümkün deyil”.
Mudrik bu işdə özünü müdafiə etmək üçün Morgan Sports Law hüquq firmasını işə cəlb edib. “Çelsi” də futbolçuya dəstək göstərir.
Qeyd: Həmin hüquq firması əvvəllər “Yuventus”un sabiq futbolçusu Pol Poqbanın dörd illik dopinq cəzasına qarşı apellyasiya prosesində də onu təmsil etmişdi. İdman Arbitraj Məhkəməsi Poqbanın cəzasını 18 aya endirmişdi. Poqba bu cəzanın mart ayında başa çatmasından sonra “Yuventus”la müqaviləsini ləğv edərək yeni klub axtarır.
Mudrik isə bilərəkdən heç bir qaydanı pozmadığını iddia edir. Məlumata görə, ukraynalı futbolçu avqust ayında dopinq testindən keçib və həmin vaxtdan etibarən davranışında heç bir dəyişiklik etmədiyini vurğulayıb.
