"Dinamo Zaqreb"in baş məşqçisi Sergey Yakiroviç Çempionlar Liqasının ilk pley-off  matçında "Qarabağ"a 3:0 hesabı ilə qalib gəldikləri oyun haqda danışıb.

90plus.az xəbər verir ki, mütəxəssis qələbənin əsas səbəbini deyib:

"Azarkeşlər üçün fantastik oyun oldu. Yaxşı mübarizə apardıq. Bir daha sübut olundu ki, rəqib hücumu və müdafiəsi olan çox güclü komandadır. Təzyiqimiz bir az azalan kimi onlar 6 oyunçu ilə bizim cərimə meydançasının qarşısında olurdular və ciddi şəkildə təzyiq edirdilər. "Qarabağ" yaxşı oynadı, amma biz də onların zəif cəhətlərindən istifadə etdik". 

Oyun planı: "Əsas məqsəd ilk hissədə topu ələ keçirmək və bununla da üstünlük yaratmaq idi. 60-cı dəqiqədə dinamikanı itirdiyimiz üçün sistemi dəyişdik. Əslində bundan sonra hədəfə çatmaq daha asan oldu. Vurduğumuz qollardan başqa daha iki-üç fürsətimiz oldu. Təəssüf ki, bunu reallaşdıra bilmədik".

"Qarabağ" haqda: "Şübhəsiz ki, "Qarabağ" "Ludoqorets"dən daha yaxşı komandadır. Uzun müddətdir birlikdədirlər və görürsən ki, onların müəyyən oyun sistemi var. Biz bilirdik ki, bu, bizə çətinlik yaradacaq, bəzi məqamlarda əziyyət çəkəcəyik. Müdafiədə bəzi kobud səhvlər etdik. Qapıçımız İvan Nevistiç yaxşı oynadı".

Cavab oyunu: "Ötən mövsümün təcrübəsindən öyrəndik ki, hər imkanından istifadə etməlisən. Bu nəticəyə görə məmnunuq, lakin oyundan əvvəl də bilirdik ki, nəticə nə olursa olsun, bizi daha 90 dəqiqə gözləyir".

Zədələnib meydana tərk edən komandanın aparıcı üzvü Stefan Ristovski haqda: "Onun zədələnməsi bizi bir qədər narahat etdi. Ristovski son vaxtlar çox yaxşı oynayır. Qarşıdakı oyunda meydana çıxa bilsə, əla olardı. Çünki sürətli oyunçudur. Sabah durumunun necə olduğunu biləcəyik".

Matçın hakim idarəçiliyi ilə bağlı: "Oyunun sonuna yaxın rəqib futbolçu topa əli ilə toxundu.  Cərimə meydançasında idi ya yox, bilmirəm. Hakimlik yaxşı idi. Hətta bəzi anlarda müəyyən səhvlərə görə üzr istədilər".