Amerika Basketbol Liqası (NBA) yaxın üç il ərzində Avropada 6 rəsmi mövsüm oyununa ev sahibliyi edəcək. NBA-nın rəsmi açıqlamasına görə, bu təşəbbüs liqanın qlobal əhatəsini genişləndirmək məqsədi daşıyır.
90plus.az xəbər verir ki, 2026-cı ildə oyunlar Berlindəki Uber Arena və Londondakı O2 Arenada keçiriləcək. 2027-ci ildə isə qarşılaşmalar Mançesterdəki Co-op Live və Parisdəki Accor Arenada baş tutacaq. 2028-ci il üçün yenidən Berlin və Paris seçilib.
Gələn il Berlində və Londonda keçiriləcək oyunlarda NBA təmsilçiləri "Memfis Qrizzls" və "Orlando Mecik" olacaq. Bu komandalar 15 yanvar 2026-cı ildə Berlində, 18 yanvar 2026-cı ildə isə Londonda qarşılaşacaqlar.
Avropa şəhərlərində 2027 və 2028-ci illərdə keçiriləcək qarşılaşmalarda iştirak edəcək digər komandaların adları isə yaxın vaxtlarda açıqlanacaq.
NBA-nın bu addımı Avropa basketbol azarkeşləri tərəfindən böyük maraqla qarşılanır və NBA-nın qlobal bazardakı nüfuzunu daha da artıracağı gözlənilir.
