Amerika Basketbol Liqasında (NBA) növbəti oyunlar keçirilib. “Boston Seltiks” səfərdə “Hyuston Rokets” üzərində 114:93 hesablı qələbə qazanıb.
90plus.az xəbər verir ki, “Toyota Center”də baş tutan qarşılaşmada Derrik Uayt 28, Peyton Priçard isə 27 xalla komandasının ən məhsuldar oyunçuları olub. Nimyas Kueta 10 xal və 19 ribaund, Luka Qarza isə 19 xalla qələbəyə töhfə verib.
Matçın gərgin anları da diqqət çəkib. “Hyuston Rokets”in baş məşqçisi İme Udoka üçüncü hissənin sonunda hakimlərlə mübahisəyə görə iki texniki faul alaraq oyundan kənarlaşdırılıb. Alperen Şəngün isə son rübün ortalarında çalınmayan faula etiraz etdiyi üçün iki texniki faul alıb və meydanı tərk edib.
Günün digər maraqlı oyununda “San Antonio Spurs” son çempion “Oklahoma Siti Tander”i 116:106 hesabı ilə məğlub edib. Bu nəticə ilə “Spurs” cari mövsümdə rəqibini dördüncü dəfə üstələyib.
“San Antonio Spurs”də Keldon Conson 25 xal, Viktor Vembanyama 22 xal və 14 ribaund, De’Aaron Foks isə 15 xal və 10 məhsuldar ötürmə ilə yadda qalıb.
Zədələrlə mübarizə aparan “Oklahoma Siti Tander”də Kenriç Uilyams 25, Ceylin Uilyams 24 xal və 12 ribaundla oynayıb. Son MVP və All-Star mükafatının sahibi Şai Gildjəs-Aleksander qarın əzələsindəki gərginlik səbəbindən bu oyunda iştirak etməyib.
