“Barselona”nın ardıcıl iki yay transfer pəncərəsində etdiyi cəlbedici təkliflərə baxmayaraq, Niko Uilyams karyerasını “Atletik Bilbao"da davam etdirmək qərarını bir daha əsaslandırıb.
90plus.az xəbər verir ki, GQ-ya danışan ispan ulduz bildirib ki, onun üçün klub və şəhər hər şey deməkdir:
“Atletik klubu və Bilbao şəhəri mənim üçün hər şeydir. Burada həm insan, həm də futbolçu kimi böyümüşəm. Bu klubu və şəhəri təmsil etmək mənə zəhmətin, təvazökarlığın və ailənin dəyərini göstərdi.”
“Yamal ona görə yox ki, dostumdur… Mən onun atasıyam”
Uilyams həm də yaxın dostu Lamin Yamal ilə bağlı zarafatla yadda qalan açıqlama verib. O, “Barselona”ya keçməməsi səbəbindən klub səviyyəsində Yamal ilə birləşmək imkanı qazanmasa da, münasibətləri eyni olaraq qalır:
“Yamal inanılmaz talantdır və bunu hər gün göstərir. Amma o bilir ki, mən onun atasıyam.”
İspaniya yığması ilə hədəf – Dünya Çempionluğu
22 yaşlı cinah oyunçusu İspaniya millisi ilə 2026 Dünya Çempionatına böyük inamla hazırlaşdıqlarını da vurğulayıb:
“Komandaya çox inanırıq. Məşqçinin istədiyi kimi birlikdə çalışırıq. Favorit göstərilməyimiz yaxşıdır, amma reytinqlər Dünya Kuboku qazanmır. Bunu meydanda etmək lazımdır.”
“Hisslərimi üstün tutdum”
Niko Uilyams yayda müqaviləsini uzadaraq “Barselona”nın təklifini rədd edib. O, bunun tamamilə ürəkdən verilmiş qərar olduğunu bildirir:
“Həmişə hisslərimi birinci yerə qoymuşam. Mən ailəcanlıyam və hər addımımda onlarla məsləhətləşirəm. Bilbaoda ailəm yanımdadır. Qardaşımın məsləhətlərinə çox güvənirəm və indi onunla Çempionlar Liqasını birlikdə yaşamaq əsl arzudur.”
İki mövsümdür “Barselona”nın israrla transfer etmək istədiyi Niko Uilyamsın bu qərarı Kataloniya klubunun planlarını dəyişsə də, “Atletik”in gələcək layihəsinə böyük güc qatıb.
