"Nyukasl" UEFA Çempionlar Liqasının pley-off mərhələsinin ilk qarşılaşması çərçivəsində sabah Bakıda "Qarabağ"ın qonağı olacaq.

90plus.az xəbər verir ki, İngiltərə klubunun baş məşqçisi Eddi Hau oyun öncəsi təşkil edilən mətbuat konfransında jurnalistlərin suallarını cavablandırıb. 48 yaşlı mütəxəssis görüş barədə düşüncələrini bölüşüb:

“Hazırda heyətimizdə ciddi problem yoxdur. Bütün futbolçularımız hazır vəziyyətdədir. Bakıya yüksək əhval-ruhiyyə ilə gəlmişik. Son matçlarda uğurlu nəticələr əldə etmişik. “Qarabağ”ı ətraflı şəkildə analiz etmişik. Onların "Çelsi" və "Liverpul"a qarşı oyunlarını incələmişik. “Qarabağ” keyfiyyətli futbol sərgiləyir, texniki bacarığı yüksək oyunçulara malikdir. Maraqlı oyun gözlənilir. “Çelsi” ilə qarşılaşma hər iki tərəf üçün ağır keçmişdi. “Qarabağ”ın gücü barədə müəyyən təsəvvür formalaşdırmışıq.

Növbəti mərhələyə yüksəlmək niyyətindəyik. Fürsətlərimizi maksimum dəyərləndirməyə çalışacağıq. Tarixi imkan əldə etmişik, pley-off mərhələsindəyik. Uzun yol qət etmişik, azarkeşlərimiz də artıq buraya gəlib. Buradan müsbət nəticə ilə ayrılmaq istəyirik. Qarşıda çətin görüşlərimiz var. Təqvimi diqqətə almışıq. Hər şeyi düzgün tənzimləmək üçün əlimizdən gələni edəcəyik. Qarşımıza məqsədlər qoymuşuq, ambisiyalarımız böyükdür. Öz gücümüzə inanırıq.

Düzünü desəm, Qurban Qurbanov haqqında geniş araşdırma aparmamışam. Bir klubda bu qədər uzun müddət çalışmaq böyük hörmət qazandırır. Komandanı motivasiya etməsi və münasibətləri yüksək qiymətləndirilməlidir. Çempionlar Liqasında uğurlu çıxış ediblər. Özünəməxsus oyun tərzləri var. Matçlarını izləmək maraqlıdır. Bu səbəbdən “Qarabağ”la oyun asan keçməyəcək.”