Vinisius Junior öz azarkeşləri tərəfindən Santyaqo Bernabeuda fitə basılmasının cavabını meydanda verdi.
90plus.az xəbər verir ki, “Real Madrid”in braziliyalı hücumçusu Vinisius Junior son oyunda göstərdiyi performansla “Matçın ən yaxşı oyunçusu” (Man of the Match) seçilib. Bir neçə gün əvvəl doğma stadionda azarkeşlərin fitinə tuş gələn Vinisius bu dəfə meydanda verdiyi cavabla diqqət mərkəzinə düşüb – 1 qol və 2 məhsuldar ötürmə.
Oyundan sonra mövzu ilə bağlı həm klub əfsanələrindən, həm də futbolçunun özündən açıqlamalar gəlib.
Arbeloa: “Bizə məhz bu Vinisius lazımdır”
“Real Madrid”in baş məşqçisi Alvaro Arbeloa Vinisiusun əhəmiyyətini xüsusi vurğulayıb:
“Əgər bütün titulları qazanmaq istəyiriksə, bizə məhz bu Vinisius lazımdır. Vini azarkeşlər tərəfindən sevilməli və istənildiyini hiss etməlidir.”
Vinisius: “Fitə basılmaq mənə ağır təsir etdi”
Matçdan sonra TNT Sports-a danışan Vinisius Junior son günlərin onun üçün asan keçmədiyini etiraf edib:
“Son günlər çox çətin idi. Fitə basılmaq və haqqımda deyilənlər mənə ağır təsir etdi.”
“Azarkeşlərin dəstəyini hiss etməliyik ki, yenidən normal vəziyyətə qayıdaq. Birlikdə olsaq, bu mövsüm çox şey qazana bilərik.”
“Topa daha çox toxunduğum zaman özümü daha yaxşı hiss edirəm.”
“Bu klub üçün etdiklərimlə xatırlanmaq istəyirəm, amma tələblər çox yüksəkdir və hər gün buna cavab verməliyəm.”
“Mən öz evimdə, rahat olduğum stadionda fitə basılmaq istəmirəm. Bu məni çox kədərləndirir. Amma azarkeşlərin də haqqı var, onlar baha bilet alırlar.”
“‘Real Madrid’də uzun müddət qalmaq istəyirəm. Müqaviləmin bitməsinə hələ 1 il var. Tələsik heç nə yoxdur. Prezidentə güvənirəm, o da mənə güvənir.”
Vinisius Juniorun bu çıxışı həm meydanda, həm də açıqlamalarında “Real Madrid” üçün məsuliyyət hiss etdiyini və klubla uzunmüddətli gələcək planladığını bir daha göstərib.
