Milli Olimpiya Komitəsinin Paris olimpiadasına yollanacaq idmançılarımız üçün təşkil etdiyi əyləncəli yolasalma mərasimində Azərbaycanın məşhur sərbəst güləşçisi Hacı Əliyev təəssüratlarını bildirib.
90plus.az xəbər verir ki, əsas medal ümidlərimizdən biri olan Hacı Paris-2024-ün onun üçün ən sonuncu və ən həlledici yarış olacağını söyləyib:
"Paris-2024 Yay Olimpiya Oyunlarına ciddi hazırlaşmışıq. Qarşıda bizi Qubada təlim-məşq toplanışı gözləyir. Həmin toplanışdan birbaşa Olimpiadanın keçiriləcəyi Parisə yola düşəcəyik. İnanırıq ki, yarış Azərbaycan idmançıları üçün uğurlu olacaq. Bu mənim üçün ən sonuncu yarışdır".
Qeyd: 4 illiyin ən mötəbər yarışında ölkəmizi 48 idmançı təmsil edəcək. Sərbəst güləş yığmamız Parisdə tam heyətlə mübarizə aparacaq.
