Belçika hüquq-mühafizə orqanları “Barselona” azarkeşlərinin Çempionlar Liqasındakı “Brügge” səfərini az qala yarımçıq qoyan avtobus yanğını ilə bağlı şübhəli şəxsi saxlayıb.
90plus.az xəbər verir ki, hadisə çərşənbə axşamı axşam saatlarında baş verib — “Blauqrana” azarkeşlərini “Yan Breydel” stadionuna aparan avtobus alışıb. Brügge polisinin məlumatına görə, yanğına nəqliyyat vasitəsinin içərisində alışan pirotexniki vasitə səbəb olub.
Azarkeşlər avtobusa minib oturarkən parıltı görünüb, alov sürətlə yayılıb və qalın tüstü fonunda təxliyə baş verib.
Saxlanılan şəxs — alışmış pirotexnikanı avtobusa gətirən kişi — ictimai təhlükəsizliyi təhlükə altına salmaqda ittiham oluna bilər. Bununla belə, onun fişəngi qəsdən, yoxsa ehtiyatsızlıqdan yandırdığı hələlik məlum deyil.
Hadisə nəticəsində xəsarət alan olmayıb, lakin bu insident UEFA-nın və yerli hakimiyyətin sərt qadağalarına baxmayaraq azarkeş səfərlərində pirotexnikanın yaratdığı təhlükəni bir daha göstərib.
