Baş məşqçi Roberto Martines Portuqaliya millisinin futbol tarixində xüsusi yer tutan “6” rəqəmi ilə bağlı maraqlı fikirlər səsləndirib.

90plus.az xəbər verir ki, ispaniyalı mütəxəssis numerologiyaya inandığını bildirib və bu rəqəmin Portuqaliya üçün uğurlu olduğunu vurğulayıb:

“Numerologiyaya inanıram. Düşünürəm ki, 6 rəqəmi bizə uğur gətirə bilər. 2016-cı ildə Portuqaliya Avropa çempionu oldu, 1966-cı ildə dünya çempionatındakı ən yaxşı nəticəsini qazandı, 2006-cı ildə isə yarımfinala yüksəldi”.

Martines əlavə edib ki, artıq Portuqaliyanın tam layiq olduğu uğurları yenidən qazanmasının vaxtıdır. Komanda qarşıdakı beynəlxalq turnirlərə hazırlığı davam etdirir.

Yeri gəlmişkən, Portuqaliya millisinin düşərgəsinə qoşulacaq "Paris Sen-Jermen" futbolçularının qrafiki də dəqiqləşib. Mayın 30-da keçiriləcək UEFA Çempionlar Liqasının Final oyununda "Arsenal" ilə qarşılaşacaq Paris təmsilçisinin dörd oyunçusu milliyə finaldan dərhal sonra qoşulacaq.

Martinesin açıqlamasına əsasən, Nuno Mendeş, Joao Neveş, Vitinya və Qonçalo Ramos klub mövsümünü başa vurduqdan sonra birbaşa milli komandanın düşərgəsinə qatılacaqlar.

Baş məşqçi bildirib ki, futbolçular əvvəlcə tam diqqətlərini klub öhdəliklərinə yönəldəcəklər, daha sonra isə milli komandaya problemsiz keçid edəcəklər.