“Vulverhempton” Vitor Pereyra ilə yollarını ayırdı. “Vulverhempton” rəhbərliyi Portuqaliyalı baş məşqçi ilə əməkdaşlığa son qoydu. Komanda mövsümə zəif start verərək Premyer Liqada qalmaq uğrunda mübarizə aparır.

90plus.az xəbər verir ki, İngiltərə Premyer Liqasının “Vulverhempton” klubu baş məşqçi Vitor Pereyra ilə yollarını ayırdığını rəsmi olaraq açıqlayıb. Klubun rəsmi saytında verilən məlumata görə, Portuqaliyalı mütəxəssislə müqavilə qarşılıqlı razılaşma əsasında ləğv edilib.

Pereyra “Vulverhempton”un başına keçdiyi yeni mövsümdə istənilən nəticəni əldə edə bilməyib. Komanda Premyer Liqada keçirdiyi ilk 10 oyunda qələbə qazana bilməyib, 8 məğlubiyyət və 2 heç-heçə ilə kifayətlənib. Bu müddətdə “sarı-qara”lar cəmi 7 qol vurub, qapısında isə 22 qol görüb.

Sentyabr ayında Pereyra klubla 2028-ci ilə qədər yeni müqavilə imzalamışdı, lakin ardıcıl beş oyunluq məğlubiyyət seriyası “Vulverhempton” tarixinin ən zəif mövsüm başlanğıcı kimi yadda qaldı. Komanda həmçinin “Çelsi”yə 4–3 hesabı ilə uduzaraq “Karabao Kuboku”nun 1/8 final mərhələsində mübarizədən kənarlaşdırılıb.

Qeyd: Pereyra 2024-cü ilin dekabrında Qari O'Nilin yerinə baş məşqçi təyin olunmuşdu. O, ötən mövsüm “Vulverhempton”u Premyer Liqada 16-cı pillədə saxlayaraq komandanın elita liqasında qalmasını təmin etmişdi.