UEFA Çempionlar Liqasının finalında Fransanın “Pari Sen-Jermen” klubu İtaliyanın “İnter” komandasını darmadağın edərək 5:0 hesablı qələbə ilə kuboka sahib çıxıb. Oyun Almaniyanın Münhen şəhərində baş tutub.
90plus.az xəbər veri ki, finaldan dərhal sonra həm Fransada, həm də Almaniyada ciddi iğtişaşlar yaşanıb. Parisdə, xüsusən də “Park de Prens” stadionunun ətrafında və Şanzelize küçəsində azarkeşlərin coşqusu nəzarətdən çıxıb. Polis kütləni dağıtmaq üçün gözyaşardıcı qaz və dəyənəklərdən istifadə edib.
Eyni zamanda, bəzi yerlərdə avtomobillər yandırılıb, barikadalar qurulub. Rəsmi məlumatlara görə, Parisdə baş verən iğtişaşlar zamanı 559 nəfər saxlanılıb.
Qanlı hadisə: 17 yaşlı gənc bıçaqlandı
Qələbə sevinci ilə başlayan gün bəzi bölgələrdə faciə ilə nəticələnib. Fransanın cənub-qərbində yerləşən Daks şəhərində PSJ-nin çempionluğunu qeyd edən izdihamın içində 17 yaşlı gənc bıçaqlanaraq həyatını itirib. Polis hadisənin araşdırıldığını açıqlayıb.
Münhendə avtomobil kütlənin üstünə sürüldü – Ölən və yaralananlar var
Final oyununun keçirildiyi Münhen şəhərində isə daha bir dəhşətli olay yaşanıb. Naməlum şəxs avtomobili insan izdihamının üstünə sürüb. Nəticədə bir neçə nəfər xəsarət alıb, ölənlərin olduğu da bildirilir. Sürücü saxlanılıb və hadisə ilə bağlı araşdırma aparılır.
Fransa mətbuatının məlumatına görə, baş verən iğtişaşlar zamanı ümumilikdə azı 205 nəfər xəsarət alıb. Onlardan 4 nəfər – o cümlədən 3 qadın – reanimasiya şöbəsində müalicə olunur. Parisdə isə 9 polis əməkdaşı yaralanıb.
Hadisələrlə bağlı hüquq-mühafizə orqanları təhlükəsizlik kameralarını incələyərək məsul şəxsləri müəyyən etməyə çalışır.
