“Qarabağ” – “Ferensvaroş”: Cavab oyunu üçün hakim briqadası açıqlanıb.

90plus.az xəbər verir ki, avqustun 27-də Tofiq Bəhramov adına Respublika Stadionunda keçiriləcək UEFA Çempionlar Liqasının pey-off mərhələsi çərçivəsində “Qarabağ” – “Ferensvaroş” cavab matçı üçün hakim təyinatları açıqlanıb. Görüş Fransadan olan hakim briqadasına həvalə edilib.

Matçı məşhur FİFA referisi Kleman Tyurpen idarə edəcək. Ona yan xətdə Nikolya Danos və Aleksis Auqer köməklik göstərəcək. Dördüncü hakim funksiyasını isə Romen Lissorq yerinə yetirəcək.

VAR sistemini Jerom Brizara, AVAR funksiyasını isə Nikolya Renvil idarə edəcək.

Qeyd: Kleman Tyurpen əvvəlki illərdə də yüksək səviyyəli final oyunlarını idarə edib. O, 2022-ci ildə Çempionlar Liqasının finalında (“Liverpul” – “Real Madrid”), 2021-ci ildə isə Avropa Liqasının finalında (“Vilyareal” – “Mançester Yunayted”) baş hakim olub.

Xatırlatma: Komandalar arasında ilk görüşdə Ağdam təmsilçisi səfərdə 3:1 hesabı ilə qalib gəlib. Cavab oyunu avqustun 27-si, yerli vaxtla saat 20:45-də start götürəcək.