"Qarabağ" səfərdə minimal hesabla qalib gəldi.

90plus.az xəbər verir ki, bu gün UEFA Çempionlar Liqasının üçüncü təsnifat mərhələsinin ilk görüşlərinə start verilib.

Azərbaycan çempionu “Qarabağ” bu mərhələdə səfərdə Şimali Makedoniyanın “Şkendiya” klubu ilə qarşılaşıb. Skopyedə yerləşən və vaxtsız vəfat etmiş məşhur müğənni Toşe Proeskinin adını daşıyan stadionda baş tutan oyunda Ağdam təmsilçisi 1:0 hesablı qələbə qazanıb.

Görüşü Slovakiyalı hakimlər briqadası idarə edib.

Komandalar arasında cavab qarşılaşması avqustun 12-də, Bakıda – Tofiq Bəhramov adına Respublika stadionunda baş tutacaq.

Bu cütün qalibi Çempionlar Liqasının pley-off mərhələsində “Ludoqorets” (Bolqarıstan) – “Ferentsvaroş” (Macarıstan) duelinin güclüsü ilə qarşılaşacaq. Məğlub komanda isə Avropa Liqasının pley-off raundunda həmin cütün uduzan tərəfi ilə üz-üzə gələcək.

UEFA Çempionlar Liqası
III təsnifat mərhələsi, ilk oyun

“Şkendiya” (Şimali Makedoniya) 0 – 1“Qarabağ” (Azərbaycan)
Toral Bayramov, 18". (penalti)