Macarıstanın "Ferentsvaroş" klubu UEFA Çempionlar Liqasının pley-off mərhələsində "Qarabağ"la qarşılaşmaya heyət itkisi ilə çıxacaq.
90plus.az xəbər verir ki, Budapeşt təmsilçisinin futbolçusu Habib Mayqa zədə səbəbindən qarşıdakı oyunlar üçün komandaya daxil edilməyib.
29 yaşlı dayaq yarımmüdafiəçisi Bolqarıstanın "Lüdoqorets" klubuna qarşı III təsnifat mərhələsinin cavab qarşılaşmasında – 3:0 hesablı qələbə qazandıqları matçda zədələnib.
Mayqanı heyətdə yeni transfer – avstraliyalı futbolçu Daniel Arzani əvəzləyib.
Bundan başqa, "Ferentsvaroş"un qış fasiləsində "Qarabağ"dan transfer etdiyi Julio Romao da siyahıya daxil edilməyib. Braziliyalı oyunçu uzunmüddətli zədə səbəbilə iştirak edə bilməyəcək.
Qeyd: "Ferentsvaroş" və "Qarabağ" arasında ilk oyun avqustun 19-da Budapeştdə, "Qrupama Arena"da baş tutacaq və Bakı vaxtı ilə saat 23:00-da başlayacaq. Cavab qarşılaşması isə avqustun 27-də, saat 20:45-də Tofiq Bəhramov adına Respublika stadionunda keçiriləcək.
