“Qəbələ” və “Sumqayıt” xal bölüşdü: penaltilər dəqiqləşmədi, baş məşqçilər fikirlərini söylədilər.
90plus.az xəbər verir ki, Misli Premyer Liqasının 21-ci turunda “Qəbələ” ilə “Sumqayıt” arasındakı qarşılaşma 0:0 hesabı ilə başa çatıb. Matçdan sonra hər iki baş məşqçi oyunu şərh edib.
Kaxaber Sxadadze - “Qəbələ”nin baş məşqçisi, matçı belə qiymətləndirib:
“Hər iki komanda yüksək səviyyəli oyun nümayiş etdirdi. Meydanda sürət və mübarizə var idi. Bu mövsüm 3-cü penaltini vura bilmədiyimizə görə təəssüflənirəm. Amma futbolda belə hallar olur. Məşqlərdə bunun üzərində çox işləyirik, lakin oyunda alınmır. Futbolçuların mübarizə aparmasından razı qaldım. Onlara təşəkkür edirəm. Bu cür işləsək, daha çox xallar qazana bilərik”.
Saşa İliç - “Sumqayıt”ın baş məşqçisi isə belə danışıb:
“Deyərdim ki, qarşılaşmanın ilk 20 dəqiqəsini yaxşı oynadıq. İkinci hissədə də oyunumuzu düzəltməyə çalışdıq. Bir sıra səhvlərə yol verdik. Epizodlarımız olsa da, yararlana bilmədik. 1 xal qazansaq da, bunu qənaətbəxş saymıram”.
