Premyer Liqada qış transfer pəncərəsi yaxınlaşdıqca Antuan Semenyo uğrunda böyük yarış qızışıb. “Bornmut”un 25 yaşlı hücumçusu həm “Liverpul”, həm də “Mançester Yunayted”in əsas hədəflərindən birinə çevrilib.
90plus.az xəbər verir ki, “Liverpul” Semenyo üçün konkret addımlar atır.
Almaniyadan gələn məlumatlara görə, “Liverpul” yanvarda oyunçunu transfer etmək üçün ciddi şəkildə çalışmağa başlayıb. Klubla Semenyo arasında ilkin təmaslar artıq baş tutub. Forvardın müqaviləsində təxminən 70 milyon avroluq sərbəstqalma maddəsi var və mersisaydlılar bunu aktivləşdirməyə hazırdır.
“Mançester Yunayted” yarışa daxil oldu
Eyni zamanda İngiltərə mətbuatı Ruben Amorimin rəhbərlik etdiyi “Yunayted”in də hücum xəttini gücləndirmək üçün Semenyoya yönəldiyini yazır. “Bornmut”la cari mövsümdə 6 qol və 3 məhsuldar ötürmə ilə çıxış edən qanalı hücumçu, “qırmızı şeytanlar”ın axtardığı sürətli və çevik profilə tam uyğundur.
Maraqlı detallardan biri də budur ki, “Yunayted” Semenyoya onun sevimli 24 nömrəsini verməyə hazırdır. Qanalı futbolçu həmin nömrəni son üç ildə daşıyıb və nömrənin hazırda komanda daxilində boş olması klubun əlini gücləndirə bilər.
Transferin şəxsi şərtlər baxımından problem yaratmayacağı bildirilir. Bu isə həm “Liverpul”, həm də digər Premyer Liqa nəhənglərinə əlavə təzyiq yaradır.
Qış pəncərəsi yaxınlaşdıqca Semenyo uğrunda yarışın daha da alovlanacağı gözlənilir.
