"Qarabağ" UEFA Çempionlar Liqasının pley-off mərhələsinin ilk oyunu çərçivəsində sabah Macarıstanda "Ferentsvaroş"la qarşılaşacaq.

90plus.az xəbər verir ki, Azərbaycan çempionunun baş məşqçisi Qurban Qurbanov oyunöncəsi təşkil olunan mətbuat konfransında jurnalistlərin suallarını cavablandırıb.

Ondan əvvəlcə yenidən bu şəhərdə olmağın necə olduğu və oyundan gözləntiləri barədə soruşulub. Qurbanov belə cavab verib:

Yenidən bu şəhərdə olmaq çox xoşdur. Hər iki komandaya uğurlar arzulayıram. Bizi çox istəkli rəqibə qarşı oyun gözləyir. Həm baş məşqçilərinin, həm futbolçuların açıqlamalarından hiss olunur ki, Çempionlar Liqasının Liqa mərhələsində oynamağı çox istəyirlər. Amma biz də bunu istəyirik. Sabah düzgün oynamağa çalışmalıyıq. Biz də istəkli olmalıyıq. İnanmıram ki, azarkeşlər oyundan razı qalacaq. Yaxşı nəticə əldə etmək istəyirik.

Mətbuat nümayəndələri daha sonra Qurbanovdan üç il əvvəlki "Ferentsvaroş"la indiki komandanı müqayisə etməsini xahiş ediblər. O isə deyib:

Futbol elə oyundur ki, daim dəyişir. 2022-ci illə müqayisədə "Ferentsvaroş"da çox şey dəyişib. Baş məşqçi, futbolçular. Bizdə də xeyli dəyişikliklər olub. Sabahkı matç hər ikimiz üçün maraqlı olacaq. Cavab oyununda bir-birimizi daha yaxşı tanıyacağıq. Sabah sona kimi mübarizə aparmağı bacarmalıyıq.

Baş məşqçiyə həmçinin indiki "Ferentsvaroş"un, yoxsa 3 il əvvəlkinin daha güclü olub-olmadığı barədə sual ünvanlanıb. Qurbanov bunu belə dəyərləndirib:

"Ferentsvaroş" həddindən artıq sürətli oynayır, hücuma çox sürətli çıxırlar. Bu komanda bizim əvvəl oynadığımız "Ferentsvaroş"dan tam fərqli sistemdə oynayır. Daha dinamik bir kollektiv var. Baş məşqçi futbolçulardan sürətli oyun tələb edir. Biz daha çox topa sahib olmağa çalışırıq. Bizim üçün heç də asan olmayacaq. Amma bu cür rəqiblərə qarşı oynamışıq.

Mətbuat konfransında Qurban Qurbanovdan 17 ildir "Qarabağ"ın başında olmasının səbəbi də soruşulub. O, zarafatla belə cavab verib:

Sadəcə olaraq məni dəyişmirlər. Ona görə 17 ildir buradayam.

Daha sonra ona "Ferentsvaroş"un çalışdırıcısı Robbi Kinin oyundan öncə əsas məqsədlərinin qol buraxmamaq olduğunu söyləməsi xatırladılıb və onun fikri soruşulub. Qurbanov bildirib:

Bəli, onun fikirlərini oxudum. Deyib ki, çox yaxşı hücum xəttimiz var. İstənilən an rəqib qapısına qol vura bilərlər. Bunu arxayın olaraq deyib. Belə oyunlarda qalib gəlmək istəyirsənsə, öncə qapını toxunulmaz saxlamağı bacarmalısan. Bu, çox vacibdir. Bununla yanaşı nəticə vermək üçün yaradıcı olmalıyıq. İlk məqsədiniz rəqibin qapısına qol vurmaqdır. Əlbəttə ki, qol buraxmasaq, yaxşı olar. Həm burada, həm də Bakıda maksimum hücumda olmağa çalışacağıq.

Sonda Qurbanova Kadi Borgesin ona "Ferentsvaroş" haqda məlumat verib-vermədiyi sualı ünvanlanıb. O isə bunu belə cavablandırıb:

Xeyr, mən belə halları xoşlamıram. Bir az qeyri-etikdir. Mən və köməkçilərim rəqib haqda məlumat toplamışıq.

Xatırlatma: “Ferentsvaroş” – “Qarabağ” görüşü sabah Bakı vaxtı ilə saat 23:00-da başlayacaq. Cavab qarşılaşması isə avqustun 27-də Bakıda keçiriləcək.