“Bu gözəl stadionda oynamaq, bu şəhərdə olmaq bizim üçün çox xoşdur. Təbii ki, daha yaxşı hazırlaşmaq istərdik. Amma bəzi səbəblərə görə istədiyimiz kimi hazırlaşa bilmədik. Hər bir halda təcrübəmiz var”.
90plus.az xəbər verir ki, “Qarabağ”ın baş məşqçisi Qurban Qurbanov UEFA Çempionlar Liqasının Liqa mərhələsinin ilk turunda sabah səfərdə “Benfika” ilə baş tutacaq oyun öncəsi keçirilən mətbuat konfransında bu fikirləri səsləndirib.
O, komandalarının güclü Portuqaliya təmsilçisindən çəkinmədiyini vurğulayıb.
“İnanıram ki, futbolçular sabah ən yaxşı oyunlarından birini oynayacaq. Çünki biz neçə illər idi ki, Çempionlar Liqasında bu mərhələdə oynamırdıq. Hər bir futbolçunun arzusu burada oynamaq idi. İnanıram ki, futbolçularımız sabah çəkinmədən və ən yaxşı oyunlarını oynayacaqlar”.
Xatırlatma: “Benfika” - “Qarabağ” oyunu sabah keçiriləcək və Bakı vaxt ilə saat 23:00-da başlanacaq.
