Misli Premyer Liqasında 1-ci turun təxirə salınmış oyununda “Sabah” öz meydanında “Qarabağ”ı  2:1 hesabı ilə məğlub etdikdən sonra baş məşqçilər fikirlərini bildiriblər.

90plus.az xəbər verir ki, Qurban Qurbanov nəticəni gözlədiyini söyləyib.

“Qarabağ”ın baş məşqçisi Qurban Qurbanov matçdan sonra bu fikirləri səsləndirib:

“Rəqibi qələbə münasibətilə təbrik edirəm. Belə bir nəticənin olacağını təxmin edirdim. Çünki son vaxtlar komandamız çox güc sərf edir. Bəzi futbolçularımızın zədəli və xəstə olması müəyyən problemlər yaratdı. Təbii ki, bütün bunlar məğlubiyyətə səbəb olmamalıdır. Bu məğlubiyyət komandaya əlavə motivasiya verməlidir.”

Montielin yoxluğu hiss olundu

Qurbanov Coni Montielin məcburi əvəzlənməsindən sonra meydanda çatışmazlıqlar yarandığını bildirib:

“Montiel üçün sıx qrafikdə oynamaq çətindir, o, hələ tam formada deyil. 3-4 gündən bir oynamağa hazır deyil. Oyunun qırılma nöqtəsi kimi bunu göstərmək düzgün olmaz, lakin meydanda olması komandamız üçün üstünlük olardı. Onun kimi usta futbolçunun yoxluğu çatışmazlıqlara səbəb olur. Məğlubiyyətin səbəbini isə kimdəsə axtarmaq istəmirəm.”

Çempionluq və Avropa perspektivi

Baş məşqçi “Sabah”ın böyük yatırımlar etdiyini və ciddi planları olduğunu xatırladıb:

“Bugünkü “Sabah” bəli, Avropada uğur qazana bilər. Çempionluğa oynayırlarsa, Avropada nə üçün nəticə verə bilməsinlər? Hamımız buna sevinərik. “Sabah”ın Avropa təcrübəsi olan məşqçisi də var. Onlar addım-addım yaxşı işlər görürlər.”