"Qarabağ"ın baş məşqçisi Qurban Qurbanov UEFA Çempionlar Liqasının III təsnifat mərhələsində “Şkendiya” ilə keçirilən ilk oyundan sonra mətbuat konfransında fikirlərini bölüşüb.

90plus.az xəbər verir ki, təcrübəli mütəxəssis səfər oyununda əldə olunan nəticədən məmnun qaldığını bildirib:

"Sona qədər mübarizə apardıqlarına görə futbolçularıma təşəkkür edirəm. Səfərdə qələbə qazanmaq çox vacib idi. Oyun ərzində səhvlərimiz çox oldu. Lakin yekunda lazım olan nəticəni qazana bildik. 'Şkendiya' barəsində ancaq xoş sözlər deyə bilərəm. Çempionlar Liqasının II təsnifat mərhələsində Rumıniya təmsilçisi FCSB komandasına qarşı gözəl çıxış etmişdilər. Belə komandaya qarşı səfərdən qalibiyyətlə dönmək sevindirici haldır. Bakıda bu rəqibə qarşı daha diqqətli oyun sərgiləməliyik. Çünki qarşımızda məğlub olmağı sevməyən bir kollektiv var."

Xatırlatma: Şimali Makedoniyada keçirilən görüşdə "Qarabağ" rəqibini 1:0 hesabı ilə məğlub edib. Cavab qarşılaşması avqustun 12-də Tofiq Bəhramov adına Respublika stadionunda oynanılacaq və saat 20:00-da start götürəcək.