Qvardiola “Nyukasl” məğlubiyyətindən sonra əsəblərini cilovlaya bilmədi – “Siti”də hücum böhranı dərinləşir.
90plus.az xəbər verir ki, Premyer Liqanın mərkəzi qarşılaşmalarından biri olan “Nyukasl” – “Mançester Siti” (2:1) oyunundan sonra Pep Qvardiola tamamilə özündən çıxdı. Şənbə gecəsi tanınmış çalışdırıcı həm “Nyukasl”ın kapitanı Bruno Gimarayeş, həm hakimlər, hətta bir operatorla belə gərgin anlar yaşadı. Bu, “Siti”nin çempionluq iddialarına ciddi zərbə vuran kabus kimi bir axşam oldu.
Kataloniyalı baş məşqçi məğlubiyyətin səbəbini açıq şəkildə hücum xəttində gördü. Qvardiola BBC Radio 5 Live-a açıqlamasında komandanın qol çatışmazlığından şikayətləndi:
“Daha çox qol vurmalıyıq. Futbolçularımızın buna qabiliyyəti və istedadı var.”
Topa sahib olmaqda böyük üstünlüyə baxmayaraq, “Siti” cəmi 4 çərçivəyə zərbə ilə kifayətləndi. Erlinq Haaland və Fil Foden bir neçə real imkanları dəyərləndirə bilmədi. Qvardiola buna toxunaraq dedi:
“Hər zamankı kimi onun iki-üç şansı oldu, çünki o ən yaxşıdır… amma bu şanslar qolla tamamlanmalıdır.”
“Siti” Haalanddan asılı vəziyyətdə qalıb
Haaland bu mövsüm Premyer Liqada artıq 14 qol vurub, lakin komandada ardıcıl olaraq qol vuran başqa futbolçu yoxdur. “Şəhərlilər”dən heç bir digər oyunçu çempionatda 1 qoldan çox vurmayıb. Bu isə Qvardiolanı ciddi şəkildə narahat edir, xüsusən də ardıcıl üçüncü səfər məğlubiyyəti fonunda.
Baş məşqçi komandasının döyüşdüyünü desə də, əsas çatışmazlığın kəskinlik olduğunu vurğuladı:
“Meydanda idik, mübarizə apardıq, amma daha kəskin olmalıyıq.”
Qvardiola vəziyyəti böyütmək istəmədiyini bildirsə də, hücum xəttindən reaksiya gözlədiyi aydın hiss olunurdu. Onun üçün artıq təkcə oyuna nəzarət yetərli deyil – qollar lazımdır, bəhanələr yox.
Hakim qərarları barədə Qvardiola nə dedi?
Oyundan sonra Pep Qvardiola hakimlik barədə belə danışdı:
▫️ “Man Yunayted” və “Kristal Palas”a qarşı FA Cup finalında oynadım. Heç vaxt hakimdən şikayət etmişəm? Xeyr, heç nə deməmişəm!
▫️ “Rəqibimi təbrik edirəm, bura oturub şikayətlənməyə gəlməmişəm. Məsələ bundan ibarətdir.”
“Mançester Siti”nin yaşadığı hücum problemi və Qvardiolanın əsəbi reaksiyası klubun yaxın oyunlarda necə cavab verəcəyini daha da maraqlı edir.
