Pep Qvardiola: “Məsum insanların öldürülməsi canımı yandırır, buna qarşı hər zaman səsimi qaldıracağam”.

90plus.az xəbər verir ki, İngiltərənin “Mançester Siti” klubunun baş məşqçisi Pep Qvardiola dünyanın müxtəlif bölgələrində, o cümlədən Fələstində baş verən hadisələrə münasibət bildirib.

Liqa Kubokunun yarımfinal mərhələsində “Nyukasl Yunayted” ilə keçiriləcək cavab oyunu öncəsi mətbuat konfransında danışan 55 yaşlı mütəxəssis məsum insanların öldürülməsinin onu dərindən sarsıtdığını deyib.

Pep Qvardiola bildirib ki, insanlıq tarixi boyunca bu qədər açıq və real görüntülərlə ilk dəfə qarşılaşırıq:
“Fələstində baş verən soyqırım, Ukraynada olanlar, Rusiyada və Sudanda yaşananlar… Bunların hamısı bəşəriyyətin problemidir, bizim məsələdir.”

İspaniyalı çalışdırıcı qeyd edib ki, o, yalnız Fələstin üçün deyil, insanlıq üçün daha yaxşı ola biləcək bütün haqlı mübarizələrə dəstək verir:
“Müharibələrdən qaçıb dənizə açılan, Aralıq dənizinə doğru gedən insanlar var. Bunun doğru və ya yanlış olduğunu soruşmayın, əvvəlcə onları xilas edin. İnsanlar ölürsə, onlara yardım etməyə borcluyuq. Sonra razılaşmaq da olar, tənqid etmək də.”

Qvardiola müasir texnologiyalara baxmayaraq insanların bir-birini öldürməyə davam etdiyini vurğulayıb:
“Bu görüntüləri görəndə canım yanır. Mənim baxışıma görə, haqsızlıq qarşısında susmaq olmaz. Minlərlə günahsız insan öldürüləndə buna qarşı ayağa qalxmaq lazımdır və mən hər zaman orada olacağam.”

Təcrübəli baş məşqçi hər gün yayılan görüntülərin insanları daha həssas olmağa vadar etməli olduğunu əlavə edib:
“Valideynlərin, uşaqların həyatlarının məhv edildiyini görəndə insan necə hiss etməyə bilər? Mən bunu hiss edirəm və hiss etməmək mümkün deyil.”