Səudiyyə Ərəbistanında qış transfer dövründə “Əl-İttihad” klubundan ayrılaraq “Əl-Hilal”a transfer olunan Kərim Benzema ilə bağlı klub əfsanəsi Məhəmməd Nur sərt açıqlamalar verib.

90plus.az xəbər verir ki, Səudiyyə Ərəbistanı təmsilçisi “Əl-İttihad”ın sabiq futbolçusu Məhəmməd Nur “Dawrina Gher” proqramında fransız ulduzu kəskin tənqid edib. 1994–2013 və 2014–2016-cı illərdə “Əl-İttihad” forması geyinmiş təcrübəli futbolçu Benzemanın komandadakı çıxışını xatırladaraq bunları deyib:

“Benzema ‘Əl-İttihad’a gəldiyi ilk mövsümdə nə etdi? Heç nə. Növbəti mövsümdə isə hər şeyi alt-üst etdi. Bəs onu kim dəstəklədi? Kim arxasında durdu? ‘Əl-İttihad’ forması ilə neçə penalti qaçırdı – 5-6 penalti, elə deyilmi?”

Nur azarkeşlərin Benzemaya göstərdiyi dəstəyin xüsusilə vacib olduğunu vurğulayıb:

“Azarkeşlər nə etdi? Onu dəstəklədi. Bütün komandanı dəstəklədi və biz həm liqanı, həm də kuboku qazandıq. Düz demirəm?”

Məhəmməd Nurun ən sərt açıqlamaları isə Benzemanın mövsümün ortasında klubdan ayrılmaq qərarına yönəlib:

“Bütün bunlardan sonra mövsümün ortasında çıxıb ‘Bu komanda üçün artıq oynamaq istəmirəm’ deyirsən. Sən kimsən? Karyerana hörmətim var, amma Ronaldodan nə fərqin var? Onunla belə müqayisə olunmursan. Heç kimsən.”