Riçarlison uşaqlıq qorxusunu danışdı: “Başımın üstünə silah dayamışdılar”.

90plus.az xəbər verir ki, Braziliya millisinin və “Tottenhem”in hücumçusu Riçarlison uşaqlıq illərində yaşadığı ağır və təhlükəli anlardan danışıb.

Riçarlison bildirib ki, o, yoxsulluq içində böyüyüb və yaşadığı mühit çox təhlükəli olub. Futbolçu uşaqlıq dövrünü xatırlayaraq qeyd edib ki, yaşadığı ərazi cinayətkar qrupların təsiri altında idi.

Onun sözlərinə görə, bir dəfə futbol oynadıqdan sonra evə qayıdarkən silahlı şəxslərlə üzləşib:

“Ən böyük qorxum? Başımın üstünə silah dayandığı an.

Biz çox yoxsulluq içində böyümüşük. Evimiz narkotik alverçilərinin mərkəzinə yaxın idi. Hər gün silah və narkotik görürdüm.

Bir gün futbol oynadıqdan sonra qayıdarkən iki nəfər silahla üstümüzə gəldi. Neymar kimi saçım var idi və Santos forması geyinmişdim — məni səhv saldılar. Birinin silahı başıma dayandı və ərazidən çıxmasam, məni öldürəcəyini dedi.

Biz qorxudan qaçdıq…”

Futbolçu həmçinin bildirib ki, onun bir çox uşaqlıq dostu ya cinayət, ya da narkotik səbəbindən həyatını itirib və ya həbs olunub.

Riçarlison qeyd edib ki, bu çətinliklər onun həyatına və karyerasına ciddi təsir göstərib, lakin futbol onun çıxış yolu olub.