Braziliya və “Real Madrid”in əfsanəsi Roberto Karlos azarkeşləri sakitləşdirərək, planlı profilaktik tibbi prosedurdan sonra “yaxşı bərpa olunduğunu” bildirib və ürək tutması ilə bağlı yayılan şayiələri qəti şəkildə təkzib edib.

90plus.az xəbər verir ki, 52 yaşlı sabiq sol müdafiəçi Instagram-da xəstəxana yatağından gülümsəyən şəklini paylaşaraq narahatlıqları aradan qaldırıb.

“Son günləd yayılan son məlumatları aydınlaşdırmaq istərdim,” Karlos yazıb.

“Yaxınlarda planlı, tibbi komandamla əvvəlcədən razılaşdırılmış profilaktik tibbi prosedurdan keçdim. Prosedur uğurla başa çatdı və mən yaxşıyam. Mən ürək tutması keçirməmişəm.

Hazırda yaxşı bərpa olunuram və tezliklə tam sağlamlığıma qayıdaraq peşəkar və şəxsi öhdəliklərimi davam etdirməyi səbirsizliklə gözləyirəm.”

İkonik müdafiəçi göstərilən dəstəyə görə minnətdarlığını ifadə edib:

“Hər kəsə dəstək, qayğı və narahatlıqlarına görə səmimi təşəkkürümü bildirirəm. Hər kəsə əminliklə demək istəyirəm ki, narahat olmağa əsas yoxdur.

Ürəkdən təşəkkürümü tibbi komandaya bildirirəm, mənimlə maraqlanan hər kəsə minnətdaram.”