Səudiyyə Ərəbistanı Liqasında çempionluq uğrunda mübarizə aparan “Əl-Nəsr”də kapitan Kristiano Ronaldo ilə bağlı diqqətçəkən hadisələr yaşanıb. Portuqaliyalı ulduz “Əl-Hilal”ın Kərim Benzemanı transfer etməsindən sonra sərt reaksiya göstərmişdi.

90plus.az xəbər verir ki, Kristiano Ronaldo Səudiyyə Ərəbistanı Fondunun “Əl-Nəsr”ə qarşı ədalətsiz davrandığını və kluba kifayət qədər dəstək vermədiyini iddia edərək oyunlara çıxmaqdan imtina etmişdi. Təcrübəli futbolçu bu səbəbdən “Əl-Riyad” və “Əl-İttihad”la keçirilən matçlarda iştirak etməyib.

ESPN-in məlumatına görə, Ronaldo Səudiyyə Ərəbistanı Futbol Federasiyası ilə görüş keçirib. Görüş zamanı portuqaliyalı ulduzun tələbləri federasiya tərəfindən qəbul olunub və bundan sonra Ronaldo yenidən meydana çıxmaq qərarı verib.

Kristiano Ronaldo bu mövsüm “Əl-Nəsr” forması ilə 22 oyuna çıxıb, 18 qol vurub və 3 məhsuldar ötürmə edib.

“Sarı-mavilər” hazırda 49 xalla turnir cədvəlində ikinci pillədə qərarlaşıb və lider “Əl-Hilal”dan cəmi 1 xal geri qalır.