Ronaldo: “Əgər seçim imkanım olsaydı, yalnız millidə oynayardım”.
90plus.az xəbər verir ki, “Əl-Nəsr” klubunun və Portuqaliya millisinin ulduz futbolçusu Kriştiano Ronaldo futbol karyerası ilə bağlı səmimi açıqlama verib.
40 yaşlı hücumçu “Portugal Football Globe” mükafatlandırma mərasimində çıxışı zamanı bildirib ki, milli forma onun üçün hər şeydən dəyərlidir:
“Artıq 22 ildir ki, yığmadayam. Bu, mənim üçün sadəcə bir forma deyil, qələbələr və emosiyalarla dolu bir tarixdir. Milli komandanın oyunlarında çıxış etmək mənim üçün qürur mənbəyidir. Əgər seçim imkanım olsaydı, yalnız millidə oynayardım, heç bir klubda yox. Milli komanda futbolçunun karyerasının zirvəsidir.”
Qeyd: Ronaldo Portuqaliya millisinin heyətində həm Avropa çempionatının, həm də Millətlər Liqasının qalibi olub. O, indiyədək millidə 223 oyunda 141 qol vurub və 45 məhsuldar ötürmə ilə yadda qalıb.
Tədbirdə ulduz futbolçu milli komandadakı nailiyyətlərinə və uzun illər göstərdiyi xidmətlərə görə “Globo Prestigio” mükafatına layiq görülüb.
