Misli Premyer Liqasının son turunda “Araz-Naxçıvan”a 2:3 hesabı ilə məğlub olan “Zirə” mövsümü uğursuz notlarla başa vurub. Qarşılaşmadan sonra paytaxt təmsilçisinin baş məşqçisi Rəşad Sadıqov həm oyunu, həm də ümumilikdə çempionatı dəyərləndirib.

90plus.az xəbər verir ki, təcrübəli mütəxəssis bildirib ki, komandanın avrokuboklara vəsiqə şansı qalmadığından futbolçuları matça kökləmək asan olmayıb:

“Buna baxmayaraq oyunçular sona qədər mübarizə apardılar. Hər iki tərəf qalib gəlmək istəyirdi. Bizim də qol imkanlarımız kifayət qədər oldu. Təəssüf ki, sadə səhvlər nəticəsində qapımızda qollar gördük”.

Sadıqov mövsüm ərzində komandanın əsas probleminin sabit nəticə əldə edə bilməməsi olduğunu vurğulayıb. Onun sözlərinə görə, “Zirə” bir çox matçlarda rəqiblərdən üstün oynasa da, bunu tabloya yansıtmaq mümkün olmayıb.

Baş məşqçi hakim qərarlarına da toxunub. Xüsusilə ikinci qol epizodunun mübahisəli olduğunu deyən Sadıqov VAR müdaxiləsinə baxmayaraq qərarın dəyişməməsinə təəccübləndiyini gizlətməyib.

O, Azərbaycan Premyer Liqasındakı ümumi vəziyyəti də şərh edib. Mütəxəssis bəzi komandaların bir neçə stadiondan istifadə etməsini və meydança problemlərini məyusedici məqam kimi qiymətləndirib. Bununla yanaşı, avrokuboklara vəsiqə qazanan klubları təbrik edərək onların buna layiq olduqlarını bildirib.

Rəşad Sadıqov əcnəbi məşqçilərin uğur faktorundan danışarkən əsas rolun klub rəhbərlərinin yaratdığı şərait və düzgün seleksiya işinə aid olduğunu deyib:

"Deyə bilmərik ki, legioner məşqçilər gələndən sonra daha fərqli şeylər oldu. Klub rəhbərləri çox ciddi işlər görür. Təbii ki, məşqçinin rolu var. Amma klubun gördüyü işləri də danmaq olmaz. Hər klub çox ciddi seleksiya aparır. Xüsusilə də iddialı klublar. "Sumqayıt"da, "Araz-Naxçıvan"da, "Turan Tovuz"da, "Sabah"da, "Neftçi"də, "Qarabağ"da ciddi seleksiya gedib. Bunu edən, vəsait ayıran, məşqçilərə şəraiti yaradan klub rəhbərləridir. Əvvəlki illərə baxsaq, görərik ki, seleksiyaya o qədər də pul ayrılmırdı. Bu gün klubunun rəqabətə tap gətirməsi üçün hamı əlindən gələni edir. İnanıram ki, bu il ən azı üç klubumuz pley-off oynayacaq".

“Bu gün iddialı klubların hamısı ciddi transfer siyasəti aparır. Klub rəhbərləri məşqçilərə hər cür şərait yaradır. Rəqabətin artmasının əsas səbəbi də budur”.

“Zirə”nin çalışdırıcısı gələn mövsüm çempionatın daha da gərgin keçəcəyini qeyd edib. O bildirib ki, klub rəhbərliyi komandaya hər zaman dəstək olub və yeni mövsümdə də məqsəd yenidən avrokuboklar uğrunda mübarizə aparmaqdır.