Mostovoydan sərt mesaj: “Murad Musayevi yox, futbolçuları tərifləyin”.
90plus.az xəbər verir ki, Rusiya millisinin sabiq yarımmüdafiəçisi Aleksandr Mostovoy “Krasnodar”ın baş məşqçisi Murad Musayev ətrafında yaranan müzakirələrə kəskin münasibət bildirib. O, Rusiya mediasına açıqlamasında Musayevin Premyer Liqada oktyabr və noyabr aylarının ən yaxşı məşqçisi seçilməsini istehzalı şəkildə dəyərləndirib.
Mostovoyun fikrincə, Musayevin ünvanına deyilən təriflər reallığı tam əks etdirmir:
“Musayev Rusiyada iki ayın ən yaxşı məşqçisidir? Maraqlıdır, bəs o, “Sabah”a gedəndə və Azərbaycan çempionatında titul qazana bilməyəndə niyə heç kim onu tərifləmirdi? Slutski 2017-ci ildən bəri dünyanı gəzir, amma ortada uğur yoxdur. Belə adamlar futbolda ön plana çıxır, əsl böyük fiqurlar isə kənarda qalır”.
Veteran futbolçu uğurların əsas müəllifi kimi məşqçiləri deyil, futbolçuları göstərib:
“2013-cü ildə SSKA-nı çempion edən Slutskı deyildi, futbolçular idi. Eyni şey 2025-ci ildə “Krasnodar” üçün də keçərlidir — çempionluğu qazanan Musayev yox, məhz oyunçulardır”.
Qeyd: Murad Musayev 2021–2024-cü illərdə “Sabah”ın baş məşqçisi olub. Onun rəhbərliyi altında Bakı klubu 2022/23 mövsümündə Azərbaycan çempionatında gümüş medal qazanmışdı.
