“Sabah”ın baş məşqçisi Valdas Dambrauskas Misli Premyer Liqasının təxirə salınmış 1-ci turunda “Qarabağ”a qarşı 2:1 hesablı qələbədən sonra komandasının çıxışını yüksək qiymətləndirib.

90plus.az xəbər verir ki, mütəxəssis komandasının çıxışını yüksək dəyərləndirib:

“Biz təkcə Azərbaycanda deyil, Avropada da adından söz etdirən bir komandaya qarşı oynadıq. Futbolçularım inanılmaz performans göstərdi, meydanda istədiyimizi böyük ölçüdə həyata keçirə bildik.”

Stadiondakı atmosferə də toxunan Dambrauskas oyunun keyfiyyətini xüsusi qeyd edib:

“Atmosfer möhtəşəm idi. Belə oyunlar futbolçuların inkişafı üçün çox vacibdir.”

Baş məşqçi qələbəyə baxmayaraq bəzi məqamlardan narazı qaldığını gizlətməyib:

“İlk hissədə ‘Qarabağ’ın cinahlarında boşluqlar var idi. Say üstünlüyü yaradıb cərimə meydançasına daxil olurduq, amma hər epizoddan yararlana bilmirdik. Bu cür anlarda daha diqqətli olmalıyıq.”

Rəqibə göstərilən təzyiqi vurğulayan mütəxəssis əlavə edib:

“Hansısa komandanın ‘Qarabağ’a qarşı belə oynamasını xatırlamıram. Buna baxmayaraq, düzəltməli olduğumuz çox şey var. Top komandaya qarşı yaranan fürsətləri dəyərləndirməsən, çətin olur.”

Turnir cədvəli ilə bağlı danışan Dambrauskas ehtiyatlı mövqe sərgiləyib:

“Liderlik məsələsinə indi yox, mövsümün sonunda baxacağıq. Rəqiblər artıq bizə qarşı daha ciddi və fərqli hazırlaşırlar.”

Heyət və transfer planlarına toxunan baş məşqçi bildirib:

“Bu heyətdən çox məmnunam. Potensiallı futbolçularımız var və onları daha da inkişaf etdirə bilərik.”

Zədəli oyunçular barədə də məlumat verən mütəxəssis deyib:

“Cesse Sekidika və Ziden Xaled zədəlidir. Cesse ötən mövsüm çox qol vurmuşdu, ümid edirəm ki, tezliklə formasını bərpa edəcək. Xaled isə uzun müddətdir zədəlidir və hələ potensialını tam göstərə bilməyib.”

Transferlərlə bağlı isə Dambrauskas tələsməyəcəklərini vurğulayıb:

“Yeni transferlər mövzusunda səbrli olmalıyıq. Gələcək oyunçular komandamızın üslubuna uyğun olmalıdır.”

Aaron Maludanın gələcəyi ilə bağlı suala cavab verən baş məşqçi sonda belə deyib:

“Mənim işim futbolçuların bacarıqlarını artırmaqdır. Müqavilə məsələləri isə klub rəhbərliyinin səlahiyyətindədir.”