UEFA Çempionlar Liqasının III təsnifat mərhələsinin ilk oyununda "Feyenoord" səfərdə "Fənərbağça" üzərində 2:1 hesablı qələbə qazandı. Görüşdən sonra Niderland təmsilçisinin baş məşqçisi Robin van Persi mətbuat konfransında maraqlı açıqlamalarla yadda qaldı.
90plus.az xəbər verir ki, gənc çalışdırıcı "Fənərbağça"nın baş məşqçisi Joze Mourinyonun matçdan əvvəl dediyi “İstanbul’a xoş gəlmisiniz, Kadıköyə xoş gəlmisiniz, cəhənnəmə xoş gəlmisiniz” sözlərinə də cavab verdi.
“Cəhənnəmə hazıram”
Van Persi bu açıqlamaya belə reaksiya verdi:
“Əgər dediklərini doğru başa düşmüşəmsə, deməli özümüzü cəhənnəm üçün hazırlamalıyıq. Mən Kadıköydə çox oyuna çıxmışam. Oradakı atmosfer möhtəşəmdir, amma bizim stadionumuzda da atmosfer hər zaman belədir. Bu oyundan qaçmayacağıq. Hələ heç nə qazanmadıq, amma uduzmadıq da. Gələn həftə nə olacağını görəcəyik.”
“İlk yarıda daha çox qola layiq idik”
Oyunun texniki təhlilinə də toxunan Van Persi bildirib:
“İlk yarıda çox yaxşı oynadıq, bir qoldan daha çoxuna layiq idik. Futbolçularım möhtəşəm enerji ilə meydana çıxdılar. İkinci yarıda isə "Fənərbağça"nın təzyiqindən çıxmaqda çətinlik çəkdik. Çox güclü bir rəqibə qarşı oynadıq. Bəzi futbolçularım çox yüksək səviyyədə çıxış etdi, bu məni sevindirdi. "Fənərbağça" uzun toplarla oynamağa çalışdı, onların meydanında təxminən 10 top ələ keçirdik və bu çox yaxşı idi.”
“Tur şansı bərabərdir”
Tur şansları ilə bağlı suala cavab verən Van Persi fikirlərini belə ifadə edib:
“Hər şey səfərdəki oyunda həll olunacaq. Məncə, "Fənərbağça" ilə "Feyenoord"un tur şansı bərabərdir. Amma bu gün biz daha yaxşı idik. İlk yarıda bir neçə qol vura bilərdik. Buna baxmayaraq, son saniyələrdə vurduğumuz qolla 2:1 hesablı qələbə qazandığımız üçün məmnunuq.”
