Fernandu Santuş: “Mənim müqaviləm qüvvədədir, istefa barədə düşünmürəm”.
90plus.az xəbər verir ki, Azərbaycan millisinin baş məşqçisi Fernandu Santuş DÇ-2026-nın seçmə mərhələsində İslandiyaya 0:5 hesabı ilə uduzduqları görüşdən sonra mətbuata açıqlama verib.
Portuqaliyalı mütəxəssis ilk yarıda komandanın plan üzrə oynadığını, lakin sonrakı mərhələdə vəziyyətin dəyişdiyini vurğulayıb:
“İlk hissədə kompakt müdafiə olunmağa çalışdıq və əks-hücumlara ümid edirdik. Ancaq fasilədən əvvəl künc zərbəsindən qol buraxdıq. Paltardəyişmə otağında futbolçulara sakit olmalarını dedim. Amma ikinci qoldan sonra komanda psixoloji cəhətdən tam sındı”.
Santuş istefa ilə bağlı yayılan söz-söhbətlərə də münasibət bildirib:
“Mənim Azərbaycan millisi ilə müqaviləm qüvvədədir. AFFA qərar verərsə, danışarıq. Ancaq öz istəyimlə istefa verməyi düşünmürəm. Buna səbəb də görmürəm”.
Baş məşqçi çıxışını komandanın növbəti oyunlarda toparlanacağına ümid etdiyini bildirərək tamamlayıb.
