İngiltərə millisinin sabiq baş məşqçisi Qaret Sautgeyt etiraf edib ki, artıq milli komandanı çalışdırmağı darıxmadan xatırlayır və bu vəzifənin “ağırlığından” azad olduğu üçün özünü rahat hiss edir.

90plus.az xəbər verir ki, Sautgeyt ötən yay İngiltərə millisinin baş məşqçisi vəzifəsindən istefa verib. O, komandaya ardıcıl iki Avropa çempionatının finalına çıxmaqda rəhbərlik edib, o cümlədən “Avro-2024”də İngiltərə gümüş medal qazanıb.

İngiltərə futboluna verdiyi xidmətlərə görə cəngavər (ser) titulu almış 54 yaşlı çalışdırıcı BBC Sport-a müsahibəsində bildirib ki, artıq diqqət mərkəzində olmamaqdan məmnundur və yeni məşqçi heyətinə işləmək üçün meydan vermək istəyir:

“Komandaya baxmaq bir az qəribə hissdir, amma etiraf edim ki, darıxmıram. Məncə, bu, önəmlidir ki, artıq divanda oturub kənardan izləyirəm və onlara qarışmıram.”

Sautgeyt izah edib ki, artıq üzərində bir millətin gözləntilərinin yükünü daşımır və bu məsuliyyət onun üçün kifayət qədər ağır olub:

“Günümün hər saatı İngiltərəni necə daha yaxşı etmək barədə düşünməklə keçirdi. Böyük təşkilatların rəhbərləri üçün bu normaldır – daim işini mümkün qədər yaxşı yerinə yetirmək barədə düşünürsən.”

Yeni baş məşqçi Tomas Tuxelin onu tənqid etməsinə baxmayaraq – Tuxel Sautgeytin komandasında “aydın kimliyin olmadığını” söyləmişdi – sabiq çalışdırıcı buna fikir vermir, dəstəyini davam etdirir və artıq azarkeş kimi komandaya evdən azarkeşlik etdiyini bildirir:

“Ölkəmin komandası ilə başda olmaq inanılmaz bir təcrübə idi, amma indi artıq növbə onlardadır. Komandanı irəli aparmaq vaxtıdır.”