“Tottenhem” azarkeşlərinin homofob şüarlarına görə cərimələndi.

90plus.az xəbər verir ki, İngiltərə Futbol Assosiasiyası (FA) “Tottenhem” klubunu 75 min funt sterlinq məbləğində cərimələyib. Cəriməyə səbəb azarkeşlərin Premyer Liqanın sentyabr ayında “Mançester Yunayted”lə keçirilən oyunu zamanı səsləndirdikləri homofob şüarlar olub.

Klub hadisədən sonra baş verənləri pisləyərək yerli polis və stadion təhlükəsizlik xidməti ilə əməkdaşlıq edərək məsul şəxsləri müəyyənləşdirməyə çalışıb.

İlkin olaraq müstəqil tənzimləyici komissiya “Tottenhem”i günahını etiraf etdikdən sonra 150 min funt cərimə, fəaliyyət planı hazırlamaq və xəbərdarlıqla cəzalandırmışdı. Lakin apellyasiya nəticəsində cərimə məbləği 75 min funt sterlinqə endirilib.

FA-nın açıqlamasında qeyd olunur ki, “Tottenhem” azarkeşlərinin qaydalara uyğun davranmasını və cinsi orientasiyaya istinad edən təhqiredici ifadələr işlətməməsini təmin edə bilməyib.

Qeyd: Hadisə oyunun 49-cu və 79-cu dəqiqələrində "Old Trafford” stadionunda baş verib.

“Tottenhem” bu cür halların qarşısını almaq üçün müəyyən tədbirlər gördüyünü bildirib. London təmsilçisi 2025/26 mövsümünə 16 avqustda “Börnli” ilə ev oyununda start verəcək.